Pléann Creed agus Vella, Coimisinéir Iascaigh an AE, an baol a bheadh do thionscal Iascaigh na hÉireann i gcás Breatimeacht 'Gan Margadh'
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
Chas Michael Creed TD, an tAire Talmhaíochta Bia agus Mara le Karmenu Vella, an Coimisinéir Iascaigh, chun an baol a bheadh ann do thionscal iascaigh na hÉireann a phlé sa chás go mbeadh Breatimeacht 'Gan Margadh' ann.
Dúirt an tAire Creed:
“Bhí cruinniú an-tairbheach agam leis an gCoimisinéir Vella inniu inar phléamar arís an baol a bheadh ann d'earnáil iascaigh na hÉireann sa chás go mbeadh Breatimeacht ‘gan margadh' ann. Chuir mé in iúl mo thuairim go mbeadh dúshláin thromchúiseacha ag baint le Breatimeacht 'Gan Margadh' do thionscal Iascaigh na hÉireann agus go mbeadh freagra comhordaithe ón AE ag teastáil. Ar ndóigh, táimid ag súil go nglacfar leis an gComhaontú Aistarraingte a shocraigh an tAE le rialtas na Ríochta Aontaithe agus go seachnófar an neamhchinnteacht a bhainfeadh le toradh ‘Gan margadh’."
Tá tograí reachtacha tugtha ar aghaidh ag an gCoimisiún chun dul i ngleic leis an úsáid a bhainfí as bearta sealadacha stad, malartú cuóta leis an RA agus rochtain chómhalartach, tograí ar chuir an tAire Creed fáilte rompu.
Dúirt an tAire freisin:
“Tá roinnt tograí tugtha ar aghaidh ag an gCoimisinéir cheana féin, tograí a gcuirim fáilte rompu, chun déileáil leis an tionchar a d'fhéadfadh a bheith ag baint le Breatimeacht mí-ordúil ach beidh tuilleadh beart de dhíth. Tá tuiscint mhór ag an gCoimisinéir Vella ar mhéid na fadhbanna a d'fhéadfadh a bheith le sárú ag tionscal iascaigh an AE agus go háirithe tionscal na hÉireann."
Phléigh an tAire Creed agus an Coimisinéir roinnt fadhbanna a d'fhéadfadh a bheith i gceist le Breatimeacht mí-ordúil ina measc go gcaillfeadh soithí AE agus na hÉireann rochtain ar zón iascaigh na RA, cosaint stoc éisc in uiscí timpeall na hÉireann ó mhéadú ar ghníomhaíocht iascaigh i ndiaidh an Bhreatimeachta agus bearta maolaithe ionchasacha ag leibhéal AE.
Mar fhocal scoir, dúirt an tAire:
“Tá sé tábhachtach go leanfadh an Coimisiún lena ról ceannaireachta lena chinntiú go mbeidh freagra comhordaithe ann ón AE d'fhonn inmharthanacht leanúnach ár gcuid flít agus inbhuanaitheacht na stoc a bhfuilimid ag brath orthu a chinntiú.”
CRÍOCH