Iarratas ar Mhaolú Níotráití 2019
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
D'fhógair an tAire Talmhaíochta, Bia agus Mara, Michael Creed TD inniu gur féidir iarratas a dhéanamh ar Mhaolú Níotráití 2019 anois ar líne:
"Tugann Maolú Níotráití deis d'fheirmeoirí dul i mbun feirmeoireachta ag rátaí níos airde stoic, faoi réir coinníollacha áirithe atá leagtha amach chun an timpeallacht a chosaint agus an Treoir maidir le Níotráití a chomhlíonadh."
Is saoráid thábhachtach an maolú d'fheirmeoirí a bhíonn i mbun dianfheirmeoireachta. Tá an córas ar líne dírithe ar an bpróiseas iarratais a shimpliú agus cuidiú le feirmeoirí pionóis a sheachaint. Is féidir le feirmeoirí na Rialacháin a chomhlíonadh freisin tríd an líon beostoic a bhainistiú, aoileach/ leasú sciodair a chur den talamh nó talamh breise a fháil ar cíos.
"Bhain beagnach 7,000 feirmeoir dianstoic leas as an maolú sa bhliain 2018. Bíonn na feirmeoirí seo i mbun sampláil ithreach, pleanáil ar bhainistíocht cothaitheach agus comhlíonann córas cigireachta níos déine d'fhonn a chinntiú go bhfuil siad i mbun feirmeoireachta de réir caighdeán ard comhshaoil."
Is saoráid thábhachtach an maolú d'fheirmeoirí a bhíonn i mbun dianfheirmeoireachta, go háirithe san Earnáil Déiríochta agus tá sé tábhachtach go ndéanfaí na cáilíochtaí ó thaobh an chomhshaoil a choinneáil. Bhain beagnach 7,000 feirmeoir dianstoic leas as an maolú sa bhliain 2018 ar limistéar talmhaíochta 466,000 heicteár. Ba ionann sin is méadú ar an limistéar agus an líon feirmeoirí a tháinig faoin maolú ó 2014.
Dá bhrí sin, d'fhógair an tAire go dtabharfaí faoi athbhreithniú ar choinníollacha an mhaolaithe i mbliana freisin.
Dúirt an tAire:
“Chun a chinntiú gur féidir leanúint leis an maolú ar bhonn inmharthana, scrúdófar san athbhreithniú deiseanna eile a bhféadfadh feirmeoirí a bhaineann leas as maolú a úsáid chun éifeachtúlachtaí a fheabhsú agus a lorg comhshaoil a laghdú."
Táthar ag súil toradh an athbhreithnithe seo chomh maith le moltaí a fhoilsiú i mí Mheitheamh na bliana seo chun dóthain ama a thabhairt d'fheirmeoirí a bhaineann leas as an maolú pleanáil don bhliain 2020.
Mar fhocal scoir, dúirt an tAire:
“Mholfainn d'fheirmeoirí dianstoic tabhairt faoin bpróiseas iarratais seo a luaithe agus is féidir agus an gá atá leis an maolú a phlé lena gcomhairleoir talmhaíochta."
Is an 31 Márta 2019 an dáta deiridh a nglacfar le hiarratais.
Is féidir le feirmeoirí nach bhfuil cláraithe le agfood.ie sin a dhéanamh trí logáil isteach ar agfood.ie agus trí chliceáil ar an gcnaipe 'Cláraigh'. Tá tuilleadh eolais le fáil ar láithreán gréasáin na Roinne ag an nasc seo a leanas: www.agriculture.gov.ie/ruralenvironmentsustainability/environmentalobligations/nitrates/nitratesderogation.
CRÍOCH
2014 | 2015 | 2016 | 2017 | 2018 | |
Líon na bhFeirmeacha a bhain leas as an Maolú | 5,800 | 6,300 | 6,800 | 7,000 | 6,900 |
Limistéar faoin Maolú Feirmeacha (ha) | 332,200 | 351,900 | 409,800 | 432,300 | 466,000 |
Meánmhéid Feirme (ha) | 58 | 56 | 60 | 62 | 68 |
Aonaid Beostoic/Maolú Feirme | 139 | 146 | 149 | 157 |
Faoin Maolú Níotráití féadann feirmeoirí an teorainn 170 kg d'aoileach in aghaidh an heicteáir mar atá leagtha síos sna Rialacháin Níotráití a shárú suas go 250 kg an heicteár, ach cloí le rialacha níos déine.
Chun go mbeidh iarratas ar Mhaolú Níotráití bailí, ní mór cloí le téarmaí agus coinníollacha ar fad an mhaolaithe, iad seo a leanas san áireamh:
Ní mór iarratas a dhéanamh chuig an Roinn gach bliain ar líne. Ní ghlacfar le hiarratais ar an bpost.
A bheith i mbun feirmeoireachta ar ghabháltas a bhfuil 80% de faoi fhéar. Féaránaigh a bheith agat - ní cheadófar maolú ach amháin i ndáil le féaránaigh.
Ní mór 50% de gach sciodar a tháirgtear ar fheirm a bheith scartha faoin 15 Meitheamh gach bliain. Ní féidir sciodar a scaradh i ndiaidh an dáta sin ach le trealamh astaíochtaí ísle.
Ní mór stóráil leordhóthanach a bheith ar gach gabháltas atá ag teacht faoin maolú chun aoileach agus uisce salach a tháirgtear ar an ngabháltas a stóráil.
Plean Leasacháin a bheith i bhfeidhm ar an ngabháltas faoin 1 Márta. Ba chóir an plean seo a chur ar aghaidh chuig an Roinn chomh maith le foirm iarratais murar chuir an feirmeoir plean leasacháin ar aghaidh chuig an Roinn sa bhliain 2016, 2017 nó 2018.
Ní mór pleananna leasacháin a bheith bunaithe ar thorthaí anailíse ithreach.
Caithfidh iarratasóirí nua nach bhfuil torthaí anailíse ithreach acu glacadh le hInnéacs 3 don bhliain 2019 ach ní mór anailís ar shampla ithreach i ndáil le bliain bairr 2020 a bheith ar fáil agus an plean leasacháin a bheith leasaithe dá réir agus curtha ar aghaidh ar líne chuig an Roinn roimh an 31 Márta 2020.
Ní mór cuntais leasacháin a bheith curtha ar aghaidh chuig an Roinn tráth nach déanaí ná an 31 Márta an bhliain ina dhiaidh sin.
Ní ceadmhach d'iarratasóirí ar Mhaolú Níotráití aoileach a thabhairt isteach ar a ngabháltas.
Tá tuilleadh eolais le fáil faoi mhaolú ar láithreán gréasáin na Roinne ag www.agriculture.gov.ie/ruralenvironmentsustainability/environmentalobligations/nitrates/nitratesderogation.